Libro de Buen Amor: 094

De cómo morió Trotaconventos, et de cómo el arçipreste fase su planto denostando et maldesiendo la muerte I 094 Pág. 094 de 112 Libro de Buen Amor Arcipreste de Hita Dize un filósofo, en su libro se nota, que pesar e tristeza el engenio embota: e yo con pesar grande non puedo dezir gota, porque Trotaconventos ya non anda nin trota. Assí fue, ¡mal pecado!, que mi vieja es muerta: murió a mí serviendo, lo que me desconuerta; non sé cómo lo diga: que mucha buena puerta me fue después çerrada, que antes me era abierta. ¡Ay Muerte! muerta seas, muerta, e mal andante, mataste a mi vieja, matases a mí ante, enemiga del mundo, que non as semejante, de tu memoria amarga non es que non se espante. Muerte al que tú fieres, liévastelo de belmés, al bueno e al malo, al rico, et al refés, a todos los egualas, e los lievas por un pres, por papas et por reyes non das una vil nues. Non catas señorío, deudo, nin...